( مانیٹرنگ ڈیسک) آڈیٹر جنرل آف پاکستان نے شاہراہوں کی تعمیر میں محکمہ مواصلات کی 7 ارب 27 کروڑ کی بے ضابطگیوں کی رپورٹ حکومت کو پیش کی ہے ۔
تفصیلات کے مطابق 7 ارب 27 کروڑ کی ان بے ضابطگیوں کی یہ رپورٹ مالی سال 2019 اور 2020 کی ہے ۔ آڈیٹر جنرل آف پاکستان نے محکمہ سی اینڈ ڈبلیو کے منصوبوں پرآڈٹ رپورٹ حکومت کو پیش کردی ہے ، آڈٹ رپورٹ کے مطابق لاہور ڈویژن میں 80 کروڑ روپے سے زائد کی مالی بے ضابطگیاں رپورٹ ہوئیں، سڑکوں کی تعمیر کیلئے سامان کی خریداری پر 1 ارب روپے کی مالی بے ضابطگی کی نشاہدہی کی گئی ہے، محکمہ مواصلات اور تعمیرات میں 1 ارب 77 کروڑ کی اضافی ادائیگیاں ٹھیکے داروں کو کی گئیں۔
دوسری جانب محکمہ مواصلات اور تعمیرات کے حکام کا کہنا ہے کہ انہوں نے آڈٹ کی نشاہدہی پر اپنے جوابات بھیجے، پراجیکٹ کی لاگت میں اضافہ ہونے پر اضافی ادائیگیاں کابینہ اور محکمہ کی منظوری کے بعد کی جاتی ہیں، آڈیٹر جنرل آف پاکستان نے اپنی رپورٹ میں محکمہ مواصلات اور تعمیرات کے جوابات کو ماننے سے انکار کرتے ہوئے لکھا ہے کہ محکمے کے جوابات قابل قبول نہیں، حکومت متعلقہ افسران کے خلاف کارروائی کرے۔
