کالعدم تنظیم ٹی ایل پی کا احتجاج ، آگے راستہ بند ہے!

موٹر وے انتظامیہ کی جانب سے التماس کی گئی ہے کہ شہری راستوں پر سفر شروع کرنے سے پہلے موٹر وے پولیس سے رابطہ کر لیں ۔

(مانیٹرنگ ڈیسک) کالعدم تنظیم کے کارکنوں نے ’کامونکی جی ٹی روڈ‘ پر پڑاؤ ڈال رکھا ہے جسکی وجہ سے لاہور سے اسلام آباد کا جی ٹی روڈ کا راستہ بند ہے ۔ موٹر وے پولیس کی تازہ ترین اپ ڈیٹ کے مطابق اگر آپ لاہور سے باہر جانے کا ارادہ رکھتے ہیں تو موٹروے کے جنڈیالہ وزیر آباد، چناب ٹول پلازہ ، گجرات۔ظفر آرکیڈز انٹر چینج کالعدم تنظیم کے احتجاج کی وجہ سے بند ہیں ،

گزشتہ روز ایک بارات کو دریائے جہلم کے پُل سے گزنے کا رستہ نہ ملا تو باراتیوں نے دولہا کو کاندھوں پر اٹھا لیا۔

کالعدم تنظیم کا مارچ اور جڑواں شہروں کی سیکیورٹی

مارچ کو روکنے کے لیے راولپنڈی میں سیکیورٹی مزید سخت کر دی گئی ہے، حکومت نے2 ماہ کے لیے پنجاب میں رینجرز کو بلا لیا ہے، رکاوٹوں کے باعث شہری شدید پریشان ہیں۔

راولپنڈی اور اسلام آباد کو ملانےوالی مرکزی شاہراہیں سیل کر دی گئیں، جس کے بعد متبادل راستوں پر شدید ٹریفک جام ہو گیا ہے۔

رکاوٹوں کے باعث شہریوں کو شدید مشکلات کا سامنا ہے، راولپنڈی میں صدر سے فیض آباد تک میٹرو سروس معطل ہے۔

فیض آباد انٹر چینج سے مریڑ چوک صدر تک مری روڈ دونوں اطراف کنٹینرز لگا کر بند کر دیا گیا ہے، چاندنی چوک سے فیض آباد تک مری روڈ سیل کر دیا گیا ہے۔

جگہ جگہ رکاوٹیں کھڑی ہونے کے باعث شہریوں کو ہی نہیں طلباء و طالبات کو بھی شدید مشکلات کا سامنا ہے۔

جڑواں شہروں میں نوکری پیشہ اور دیہاڑی دار مزدور پریشانی کا شکار ہو گئے، راستوں کی بندش کی وجہ سے مسافر پیدل سفر کرنے پر مجبور ہیں جبکہ مریضوں کا اسپتال جانا مشکل ہو گیا ہے۔

Banned TLP Road Blocked