شہر لاہور کا موسم شدید سرد، دھند کے باعث ائیرپورٹ پر فلائٹ آپریشن معطل، موٹرویز بند،ٹرینوں کا شیڈیول درہم برہم

( مائرہ ارجمند) آج اتوار ہے فروری کی 6 تاریخ عیسوی سال 2022، 4 رجب قمری سال 1443 جبکہ ماگھ کی 24 تاریخ اور دیسی کیلینڈر کا 2078 واں سال ہے۔

شہر لاہور میں دھند نے ڈیرے ڈال رکھے ہیں، علامہ اقبال ائیر پورٹ پر حد نگاہ 100 میٹر رہ جانے کے بعد فلائٹ آپریشن معطل کر دیا گیا ہے اور متعدد اندرون اور بیرون ملک آنے اور جانے والی پروازیں منسوخ یا ری شیڈیول کر دی گئی ہیں ۔ ٹرینوں کا نظام بھی درہم برہم اور لاہور سے منسلک تقریبا تمام موٹرویز اسوقت بند ہیں ۔

آلودگی کی بات کی جائے اے کیو آئی یعنی ائیر پولشن انڈیکس کے مطابق لاہور کی فضا اب قدرے بہتر ہے اور مجموعی طور پر شہر میں آلودگی کی سطح 159 اے کیو آئی ہے اور دنیا کے آلودہ ترین شہروں میں لاہور آج موجود نہیں ہے ۔لاہور کے آلودہ ترین علاقوں کی بات کریں تو ایچی سن کالج مال روڈ 198 اے کیو آئی کیساتھ پہلے، گرین ٹاون 197 کیساتھ دوسرے اور ظفر علی روڈ 193 اے کیو آئی کیساتھ تیسرے نمبر پر ہیں۔

محکمہ موسمیات کے مطابق آج شہر میں کم سے کم درجہ حرارت 7 ڈگری اور زیادہ سے زیادہ 19 ڈگری رہنے کی توقع ہے، جبکہ ہوا میں نمی کا تناسب100 فیصد ریکارڈ کیا گیا، اگلے 24 گھنٹے کے دوران سردی کی لہر برقرار رہے گی۔