گرین پاسپورٹ کی عزت ،پاکستان شمالی کوریا، صومالیہ اور یمن سے بھی نیچے 108 نمبر پرہے

( مانیٹرنگ ڈیسک)دنیا کا طاقتور ترین پاسپورٹ کس ملک کا ہے؟ پاکستانی پاسپورٹ کس نمبر پر ہے؟ اس حوالے سے نئی درجہ بندی جاری کر دی گئی۔

طاقتور ترین پاسپورٹ میں جرمنی اور جنوبی کوریا دوسرے نمبر پر ہیں، جہاں کے شہری 190 ممالک کا سفر بغیر ویزے کے کر سکتے ہیں۔

پاسپورٹ کی درجہ بندی جاری کرنے والی تنظیم ہینلے اینڈ پارٹنرز نے 2022ء کے لیے ہینلے پاسپورٹ انڈیکس جاری کر دیا جس میں جاپان اور سنگاپور ایک بار پھر دنیا کے طاقتور ترین پاسپورٹ قرار پائے ہیں، جن کے شہری بغیر ویزے کے 192 ممالک کا سفر کر سکتے ہیں۔

انڈیکس میں پاکستان شمالی کوریا، صومالیہ اور یمن سے بھی نیچے 108 نمبر ہے، پاکستان کے شہری صرف 31 ممالک میں ویزا فری سفر کر سکتے ہیں۔

رینکنگ میں شمالی کوریا کا پاسپورٹ 104، صومالیہ کا 106 اور یمن کا 107 نمبر پر ہے، پاکستان کے بعد شام 109، عراق 110 اور افغانستان 111 ویں نمبر پر ہے۔

بھارتی پاسپورٹ 83 ویں پوزیشن پر ہے، جہاں کے شہری 60 ممالک کا ویزا فری سفر کر سکتے ہیں۔

یہ درجہ بندی ہر سال کے شروع میں جاری کی جاتی ہے اور اس کے بعد اسے ہر 3 ماہ بعد اپ ڈیٹ کیا جاتا ہے۔

ہینلے پاسپورٹ ویزا انڈیکس کی ویب سائٹ کے مطابق ریئل ٹائم ڈیٹا کو سال بھر میں اپ ڈیٹ کیا جاتا ہے اور اس میں ویزا پالیسی میں تبدیلیوں کو بھی مدِ نظر رکھا گیا ہے، یہ ڈیٹا انٹرنیشنل ٹرانسپورٹ ایسوسی ایشن (IATA) سے لیا گیا ہے۔

درجہ بندی کا فیصلہ اس بنیاد پر کیا جاتا ہے کہ کسی ملک کا پاسپورٹ رکھنے والا پہلے ویزا حاصل کیے بغیر کتنے دوسرے ممالک کا سفر کر سکتا ہے، یعنی سفر کے لیے انہیں پہلے سے ویزا حاصل کرنے کی ضرورت نہیں ہوتی۔