عمران خان کی 10مقدمات میں ضمانت قبل از گرفتاری منظور
( سفیان سعید خان ) سابق وزیراعظم عمران خان ضمانت کیلئے اسلام آباد کی مقامی عدالت پہنچ گئے۔
عدالت نے پی ٹی آئی لانگ مارچ کے دوران توڑ پھوڑ کے معاملے میں سابق وزیراعظم کی 10 مقدمات میں 6 جولائی تک ضمانت کی درخواستیں منظور کر لیں۔
تفصیلات کے مطابق اسلام آباد ڈسٹرکٹ سیشن کی عدالت کے جج کامران بشارت مفتی نے سماعت کرتے ہوئے پولیس کو ریکارڈ سمیت آئندہ سماعت پر طلب کر لیا۔
پی ٹی آئی لانگ مارچ کے دوران توڑ پھوڑ کرنے کے معاملے میں سابق وزیراعظم عمران خان نے ضمانت کے لیےعدالت سے رجوع کیا۔
عمران خان نے 10 مقدمات میں ضمانت کے لیےعدالت سے رجوع کیا۔
سابق وزیراعظم عمران خان کی اسلام آباد ڈسٹرکٹ سیشن جج کی عدالت میں آمد کے موقع پر سیکیورٹی کے انتہائی سخت انتظامات کیے گئے۔
یاد رہے کہ گزشتہ رات وزیر داخلہ رانا ثنااللہ نے کہا تھا کہ عمران خان کو گرفتار کرنا ملکی مفاد میں ہوگا، نیب کے حوالے سے انہوں نے کہا کہ سابق چیئرمین نیب کو خاتون کو ہراساں کرنے کی ویڈیو کے معاملے میں دبائو میں لاکر انتقامی کارروائیاں کی گئیں۔
وزیرداخلہ رانا ثنا اللہ نے میڈیا سے گفتگو کرتے ہوئے کہا کہ آئندہ چند دنوں میں چیئرمین نیب کا فیصلہ ہوجائے گا ، ایسا چیئرمین نیب ہو گا جو انصاف کے تقاضے پورے کرے گا اور ادارے کے اندرخرابیاں بھی دور کریگا ۔
رانا ثنا اللہ نے کہا کہ عمران خان کا امریکی سازش سے شروع ہونے والابیانیہ نیوٹرل پر آپہنچا، عمران خان بتائیں کہ شہباز شریف کیخلاف کونسے 70 کیسز ہیں؟
وزیر داخلہ نے کہا کہ عمران خان اداروں کو مس یوز کرتے رہے، جو چیزساڑھے تین سال ثابت نہیں کر سکے اب کیا کریں گے، ریٹائرڈ ججوں کو احتساب عدالت میں لگانے کا مقصد انتقام کے ایجنڈے کو آگے بڑھانا تھا، کیسز کو جھوٹا ثابت کرنا ہمارا آئینی حق ہے۔
وزیرداخلہ کا مزید کہنا تھا کہ اگر کسی تحقیقاتی ادارے نے عمران خان اور ان کی اہلیہ کا نام ای سی ایل میں ڈالنے کا کہا تو دیر نہیں لگائیں گے.
