لاہور ہائی کورٹ نے مریم نواز کے پاسپورٹ واپسی کیس پر سماعت سے معذرت کر لی

( جہانزیب احمد خان ) لاہور ہائیکورٹ کے جج نے مسلم لیگ ن کی رہنما مریم نواز کا پاسپورٹ واپس کرنے کی درخواست پر سماعت سے معذرت کر لی۔

لاہور ہائیکورٹ میں مریم نواز کی پاسپورٹ واپسی کی درخواست پر سماعت جسٹس علی باقر نجفی اور جسٹس انوارالحق پنوں پر مشتمل بینچ نے کی۔

دو رکنی بینچ کے جسٹس انوارالحق پنوں نے مریم نواز کا کیس سننے سے معذرت کر لی۔

جسٹس انواز الحق پنوں کی جانب سے کیس سننے سے معذرت کے بعد مریم نواز کی درخواست چیف جسٹس لاہور ہائیکورٹ کو بھجوادی گئی۔

یاد رہے کہ رمضان شوگر ملز کیس میں عدالت نے مریم نواز کا پاسپورٹ ضبط کرنے کا حکم دیا تھا جس کے خلاف مریم نواز نے عدالت سے رجوع کرتے ہوئے کہا تھا کہ جب والدہ بستر مرگ پر تھیں تو اس وقت بھی وطن واپس آگئی تھی، عمرے کی ادائیگی کے لیے پاسپورٹ واپس کیا جائے۔

مریم نواز کے وکیل کا موقف

مسلم لیگ ن کی نائب صدر مریم نواز نے ایک بار پھر اپنے پاسپورٹ کی واپسی کے لئے لاہور ہائی کورٹ میں متفرق درخواست دائر کی تھی۔

مریم نواز نے اپنے وکیل امجد پرویز ایڈووکیٹ کی وساطت سے درخواست دائر میں بتایا کہ ان کا پاسپورٹ 4 سال سے عدالتی تحویل میں ہے۔

درخواست میں مؤقف پیش کیا گیا ہے کہ چار سال کا عرصہ گزر چکا ہے لیکن مریم نواز کے خلاف چوہدری شوگر مل کا ریفرنس تاحال دائر نہیں ہوسکا۔

درخواست میں استدعا کرتے ہوئے مؤقف اختیار کیا گیا ہے کہ لمبے عرصے کے لیے کسی شخص کو اس کے بنیادی حقوق سے محروم نہیں رکھا جاسکتا، عدالت رجسٹرار ہائیکورٹ کو پاسپورٹ واپس کرنے کا حکم دے۔

مریم نواز کی پاسپورٹ واپسی کی درخواست پر نیب کو نوٹس

25 اپریل کو بھی مسلم لیگ ن کی نائب صدر مریم نواز کی عمرے پرجانے کے لیے پاسپورٹ واپس لینے کی درخواست پر سماعت ہوئی تھی، درخواست پر سماعت جسٹس علی باقرنجفی کی سربراہی پرمشتمل 2 رکنی بینچ نے کی۔ اور عدالت نے نیب کو نوٹسز جاری کرتے ہوئے جواب طلب کیا۔

مریم نواز کے وکیل احسن بھون نے عدالت کو بتایا کہ مریم نواز کو عمرے کے لئے سعودی عرب جانا ہے۔ مریم نواز کی اس عدالت کے سامنے درخواست صرف پاسپورٹ کی واپسی کی حد تک ہے،ای سی ایل میں نام کےحوالے سے حکومت خود دیکھے گی۔

درخواست پر سماعت کے لئے بننے والے 2 بنچ ٹوٹ گئے

26 اپریل کو نائب صدر ن لیگ مریم نواز کی عمرہ روانگی کیلیے پاسپورٹ کی واپسی کی درخواست پر سماعت کے لیے تشکیل لاہور ہائیکورٹ کے دو بینچ ایک ہی روز میں ٹوٹ گئے۔

پہلے جسٹس فاروق حیدر کی معذرت کے بعد 2 رکنی بینچ تحلیل ہوا، اور بعد میں جسٹس اسجد جاوید کی معذرت کے بعد ایک دن میں دو بنچ ٹوٹ گئے۔

مریم نوازنے پاسپورٹ واپسی کی درخواست واپس لی تھی

27 اپریل کو لاہور ہائی کورٹ میں ن لیگی رہنما مریم نواز شریف کی عمرہ روانگی کیلئے پاسپورٹ واپسی کی درخواست پر سماعت ہوئی۔ جسٹس علی باقر نجفی اور جسٹس سردار احمد نعیم پر مشتمل دو رکنی بینچ نے درخواست پر سماعت کی۔

اس موقع پر مریم نواز شریف کے وکیل امجد پرویز نے عدالت کے روبرو پیش ہو کر درخواست واپس لینے کی استدعا کی۔ جس پر عدالت نے مریم نواز کے وکیل کی استدعا منظور کرتے ہوئے مریم نواز کی درخواست واپس کردی۔

مریم نوازشریف کے وکیل کا کہنا تھا کہ کل کی ٹکٹ تھی، اتنی جلدی پٹیشن پر فیصلہ ممکن نہیں تھا، موکل کی ہدایت پر درخواست واپس لے لی ہے۔ یہاں یہ بات بھی قابل ذکر ہے کہ مریم نواز نے عمرہ کرنے اور پھر لندن جانے کیلئے پاسپورٹ واپسی کی درخواست کی تھی۔