مسجد نبوی کا واقعہ : شیخ رشید کا بھتیجا گرفتاری کے بعد ایف آئی اے کےسیل میں پہنچا دیا گیا

( شیتل ملک ) مسجدِ نبوی صلی اللّٰہ علیہ وسلم میں نعرے لگانے کے معاملہ پر گرفتار کیے جانے والے سابق وزیرِ داخلہ شیخ رشید کے بھتیجے ایم این اے شیخ راشد شفیق کو ایف آئی اے کے سیل شفٹ کر دیا گیا ہے۔

شیخ راشد شفیق عمرے کی ادائیگی کے بعد نجی ایئر لائن کی پرواز سے اسلام آباد پہنچے تھے کہ انہیں اسلام آباد ایئر پورٹ پر گرفتار کر لیا گیا ۔ جسکے بعد انہیںآج ایف آئی اے کے سیل میں شفٹ کر دیا گیا ہے۔

شیخ راشد شفیق کے خلاف پنجاب کے شہر فیصل آباد میں مقدمہ درج کیا گیا تھا۔

مسجد نبوی میں ہنگامہ آرائی اور مسجد کے تقدس کو پامال کرنے کے اس مقدمہ میں چیئرمین پی ٹی آئی عمران خان، فواد چوہدری، شہباز گِل، انیل مسرت، نبیل مسرت، جہانگیر چیکو، رانا عبدالستار اور عامر الیاس بھی ملزم نامزد ہیں۔

اس انتہائی حساس نوعیت کے مقدمہ 15 معلوم اور 100 سے 150 نامعلوم ملزمان کے خلاف درج کیا گیا تھا۔

مقدمہ محمد نعیم کی مدعیت میں تھانہ مدینہ ٹاؤن میں درج کیا گیا۔

مقدمہ میں توہینِ مذہب کی دفعہ سمیت 4 دفعات لگائی گئی ہیں جن کے تحت ملزمان کو عمر قید ہو سکتی ہے۔

ایف آئی آر میں کہا گیا ہے کہ مسجد نبوی ﷺ میں پاکستانی زائرین کو ہراساں کر کے شعائرِ اسلام کی انجام دہی سے زبردستی روکا گیا۔

ایف آئی آر کے متن کے مطابق یہ سارا واقعہ سوچی سمجھی سازش کے تحت پیش آیا۔