وزیر خارجہ شاہ محمود قریشی نے صدارتی نظام کی خبروں کو مسترد کرتے ہوئے انہیں قیاس آرائیاں قرار دے دیا۔
ملتان میں میڈیا سے گفتگو کرتے ہوئے ایک سوال کے جواب میں وزیر خارجہ شاہ محمود قریشی کا کہنا تھا کہ صدارتی نظام کے نفاذ کی خبریں قیاس آرائیوں پر مبنی ہیں، یہ پتنگ اڑتی رہتی ہے، پتنگ نہ اڑائیں تو کام کیسے چلے گا۔
بین الاقوامی مالیاتی فنڈ (آئی ایم ایف) سے قرض لینے کے حوالے سے انہوں نے کہا کہ ہمیں آئی ایم ایف کی شرائط اس لیے ماننا پڑیں کیونکہ معیشت میں سکت نہیں تھی کہ گزشتہ حکومت کا چھوڑا گیا 20 ارب ڈالر کا خسارہ پورا کیا جاسکے۔
انہوں نے کہا کہ ہم نے چین، سعودی عرب سمیت اپنے دوست ممالک سے مدد لی لیکن اس کے باوجود ہمیں آئی ایم ایف کے پاس جانا پڑا۔
