( مانیٹرنگ ڈیسک ) بالی ووڈ اسٹار رنبیر کپور نے فلمی کیریئر کے آغاز سے قبل عامر خان کے مشورے کو نہ ماننے کی غلطی کا اعتراف کرلیا۔ ایک انٹرویو میں رنبیر کپور نے اعتراف کیا کہ انہوں نے عامر خان کا ایک شاندار مشورہ نظر انداز کر دیا تھا۔انہوں نے بتایا کہ یہ اس وقت کی بات ہے جب میں نے فلمی دنیا میں قدم رکھنے کا فیصلہ کیا تھا، ایسے موقع پر عامر خان نے مجھے مشورہ دیا تو میں نے یہ سوچ کر اسے ماننے سے انکار کیا کہ یہ کیا بول رہا ہے۔
رنبیر کپور نے بتایا کہ عامر خان نے مجھے اداکار بننے سے پہلے کہا تھا کہ فلمی دنیا میں قدم رکھنے سے پہلے، اپنا بیگ باندھو اور بس یا ٹرین کے ذریعے پورے بھارت کا سفر کرو، ملک کے چھوٹے چھوٹے شہروں میں جاﺅ۔رنبیر کپور نے یہ بھی کہا کہ عامر نے مجھ سے کہا کہ ہم جیسے مراعات یافتہ لوگ، جو عیش و عشرت میں پلے بڑھے ہیں، وہ ملک کی ثقافت کے رنگوں سے واقف نہیں ہیں۔ان کا کہنا تھا کہ عامر خان کا یہ مشورہ بالکل درست تھا، وہ مجھے بالکل صحیح بات بتانے کی کوشش کر رہے تھے لیکن تب میں نے ان کی بات نظر انداز کر دی۔
