( شیتل ملک) کراچی کے علاقے صدر میں زوردار دھماکا ہوا ہے، جس میں ایک شخص جاں بحق اور 13 افراد زخمی ہوگئے جبکہ متعدد گاڑیوں کو بھی نقصان پہنچا ہے
وزیراعظم شہباز شریف اور وزیر خارجہ بلاول بھٹو نے کراچی کے علاقے صدر میں ہوئے دھماکے کی مذمت کرتے ہوئے جانی نقصان پر گہرے دکھ کا اظہار کیا ہے۔
وزیراعظم شہباز شریف نے کہا کہ جاں بحق شخص کے اہل خانہ سے دلی تعزیت اور ہمدردی کرتے ہیں۔
شہباز شریف نے زخمیوں کی جلد صحت یابی کی دعا کرتے ہوئے کہا کہ صوبائی حکومتوں سے مل کر عوام اور امن دشمن عناصر کا قلع قمع کریں گے۔
وزیراعظم شہباز شریف نے وزیر اعلیٰ سندھ کو زخمیوں کو بہترین طبی سہولیات فراہم کرنے کی ہدایت کی۔
کراچی کے مصروف ترین کاروباری علاقے صدر میں ہونے والے دھماکے کے نتیجے میں 1 شخص جاں بحق ہوگیا، جس کی شناخت عمر صدیق کے نام سے ہوئی ہے، جو بزرٹا لائن کا رہائشی تھا۔
وزیر خارجہ بلاول بھٹو زرداری نے بھی کراچی میں دھماکے کی مذمت کرتے ہوئے جانی نقصان پر گہرے دکھ کا اظہار کیا ہے۔
اہل خانہ کے مطابق دھماکے میں جاں بحق عمر صدیق جناح ہسپتال میں ملازمت کرتا تھا۔
ڈی آئی جی ساؤتھ شرجیل کھرل کا کہنا ہے کہ دھماکا خیز مواد سائیکل میں نصب تھا، کوئی ادارہ یا کوئی مخصوص گاڑی ٹارگٹ نہیں تھی۔
پولیس کا کہنا ہے کہ دھماکے کے وقت کوسٹ گارڈ کی گاڑی وہاں سے گزر رہی تھی، جس کے قریب ہی دھماکا ہوا۔
ترجمان جناح ہسپتال کا کہنا ہے کہ دھماکے میں ایک شخص جاں بحق اور 7 زخمی ہوئے ہیں، زخمیوں کے جسم پر بال بیئرنگ کے زخم آئے ہیں۔
کراچی کے علاقے صدر میں دھماکے کے نتیجے میں زخمی ہونے والوں کے نام سامنے آگئے ہیں۔
جناح ہسپتال کی جانب سے جاری کی گئی رپورٹ کے مطابق دھماکے میں 24 سالہ شہروز، 26 سالہ زاہد، 14 سالہ فرزان، 42 سالہ محمد عامر، 18 سالہ عمران احمد ، 17 سالہ عبدالمنان اور 30 سالہ ولی محمد زخمی ہوئے ہیں۔
پولیس کے مطابق دھماکہ مرشد بازار کے قریب ایک بیکری اور ہوٹل کے باہر ہوا جہاں رات کے اس پہر کافی چہل پہل ہوتی ہے۔
دھماکے سے قریبی ہوٹلوں اور رہائشی عمارتوں کے شیشے ٹوٹ گئے۔
دھماکے سے دو فرلانگ دور کے رہائشی ایک شخص منصور نے بتایا کہ وہ اپنے گھر میں کھانا کھا رہا تھا کہ زوردار دھماکے سے ان کا فلیٹ ہل کر رہ گیا۔
ایدھی فاؤنڈیشن کے ترجمان کے مطابق کئی زخمیوں کو جائے وقوعہ سے ان کی گاڑیوں اور عملے نے اٹھایا ہے، جنہیں جناح اسپتال منتقل کیا گیا ہے۔
اطلاع ملتے ہی پولیس اور رینجرز کی بھاری نفری موقع پر پہنچ گئی اور علاقے کا گھیراؤ کر لیا۔ پولیس کے مطابق بم ڈسپوزل اسکواڈ کو بھی موقع پر طلب کیا گیا۔
