پاکستانی نژاد امریکی دستاویزی فلم ساز محمد علی نقوی جنہیں گزشتہ ماہ آسکر اکیڈمی کے ممبران میں شامل ہونے کا اعزاز ملا، اب ان کی دستاویزی فلم ’ٹرننگ پوائنٹ: 9/11 اینڈ وار آن ٹیرر‘ کو ایمی ایوازڈز میں نامزدگی مل گئی ہے۔
محمد علی نقوی نے فوٹو اینڈ ویڈیو شیئرنگ ایپ انسٹاگرام پر اپنی دستاویزی فلم کے پوسٹر اور ایمی ایوارڈز میں نامزدگی کی تصویر کا کولاج شیئر کرتے ہوئے اپنے فالوورز کو یہ بڑی خوشخبری دی ہے۔
اُنہوں نے کولاج شیئر کرتے ہوئے لکھا کہ’ہماری دستاویزی فلم ٹرننگ پوائنٹ: 9/11 اینڈ وار آن ٹیرر کو ایمی ایوارڈز کے لیے نامزد کیا گیا ہے!‘
سٹریمنگ پلیٹ فارم نیٹ فلکس کے لیے بنائی گئی پانچ حصّوں پر مشتمل یہ دستاویزی فلم نیویارک میں11 ستمبر 2001 کو ہونے والے حملوں کے ساتھ ساتھ امریکا اور افغانستان کے درمیان ہونے والے واقعات پر مبنی ہے۔
برائن نیپنبرگر کی ہدایتکاری میں بننے والی اس دستاویزی سیریز کا آغاز 9/11 کے المناک واقعات سے ہوتا ہے۔
