( شیتل ملک ) تحریک لبیک پاکستان نے این اے 240 کے نتائج چیلنج کرنے کا اعلان کر دیا۔
سربراہ تحریک لبیک پاکستان علامہ سعد رضوی کا کہنا ہے کہ نتائج روک کر مخالف پارٹی کو جتوایا گیا، جہاں اکثریت تھی وہاں ہمارے ووٹ مسترد کیے گئے، ری کاؤنٹنگ کی طرف جا رہے ہیں، ہر فورم پر اپنے ووٹ پر پہرہ دیں گے۔
کراچی کے علاقے کورنگی میں این اے 240 کی نشست پر گزشتہ روز ضمنی انتخاب کیلئے پولنگ ہوئی جس میں غیر سرکاری نتائج کے مطابق متحدہ قومی موومنٹ کے محمد ابوبکر نے میدان مار لیا۔
اس ضمنی انتخاب میں 25 امیدوار میدان میں تھے جبکہ یہ نشست ایم کیو ایم پاکستان کے رکن قومی اسمبلی اقبال محمد علی کے انتقال پر خالی ہوئی تھی۔ پولنگ کے دوران ہنگامہ آرائی اور فائرنگ کے واقعات بھی پیش آئے جس کے نتیجے میں ایک شخص جاں بحق اور متعدد زخمی ہوئے۔
