شہر لاہور کا موسم بدلنے لگا، درجہ حرارت میں اضافہ ،اگلے 24 گھنٹوں میں بارش کا کوئی امکان نہیں

(مائرہ ارجمند) آج ہفتہ ہے ،مارچ کی 12 تاریخ عیسوی سال 2022، 8 شبعاں اور قمری سال 1443 جبکہ پھگن کی 28 تاریخ اور دیسی کیلینڈر کا 2078 واں سال ہے۔

شہر لاہور میں موسم تیزی سے تبدیل ہو رہا ہے ، بہار کی رت کچھ دن کی مہمان ہے اور درجہ حرارت میں روز بروز اضافہ ہوتا جا ر ہا ہے ۔ محکمہ موسمیات کے مطابق اگلے چوبیس گھنٹوں کے دوران لاہور سمیت پنجاب بھر میں بارش کا کوئی امکان نہیں ۔

آلودگی کی بات کی جائے تو موسم سرما کے مقابلے میں فضائی آلودگی میں خاطر خواہ کمی واقع ہوئی ہے۔ چند روز قبل لاہور کی فضا بلکل صاف ہو گئی تھی اور ائیر کوالٹی انڈیکس 50 کے لگ بھگ تھا لیکن گزشتہ روز سے آلودگی کا مسئلہ پھر سے سر اٹھانے لگا ہے اور آج پھر سے لاہور دنیا بھر کے آلودہ ترین شہروں میں پانچویں نمبر پر ہے ۔ لاہور میں مجموعی اے کیو آئی یعنی ائیر کوالٹی انڈیکس 171 پر ہے جو آلودگی کے اعتبار سے چوتھا درجہ ہے اور اسے آلودگی کا برا درجہ خیال کیا جاتا ہے ۔ لاہور کے آلودہ ترین علاقوں میں ظفر علی روڈآج سرفہرست ہے جہاں اے کیو آئی 198 ریکارڈ کیا گیا ہے ، جبکہ کوٹ لکھپت 196 اے کیو آئی کیساتھ دوسرے اور فیز5 ڈیفنس191 اے کیو آئی کیساتھ تیسرے نمبر پر ہے

محکمہ موسمیات کے مطابق آج شہر میں کم سے کم درجہ حرارت15 ڈگری اور زیادہ سے زیادہ33 ڈگری رہنے کی توقع ہے، جبکہ ہوا میں نمی کا تناسب68 فیصد ریکارڈ کیا گیاہے۔