(مائرہ ارجمند) آج سوموار ہے ،مارچ کی 14 تاریخ عیسوی سال 2022، 10 شبعاں اور قمری سال 1443 جبکہ چیت کی یکم تاریخ اور دیسی کیلینڈر کا 2079 واں سال ہے۔
شہر لاہور میں موسم تیزی سے تبدیل ہو رہا ہے ، نئے دیسی سال کے پہلے روز گرمی کی شروعات۔ محکمہ موسمیات کے مطابق اگلے چوبیس گھنٹوں کے دوران لاہور سمیت پنجاب بھر میں بارش کا کوئی امکان نہیں ۔
آلودگی کی بات کی جائے تو موسم سرما کے مقابلے میں فضائی آلودگی میں خاطر خواہ کمی واقع ہوئی ہے۔ چند روز قبل لاہور کی فضا بلکل صاف ہو گئی تھی اور ائیر کوالٹی انڈیکس 50 کے لگ بھگ تھا لیکن گزشتہ روز سے آلودگی کا مسئلہ پھر سے سر اٹھانے لگا ہے اور آج پھر سے لاہور دنیا بھر کے آلودہ ترین شہروں میں دوسرے نمبر پر ہے ۔ لاہور میں مجموعی اے کیو آئی یعنی ائیر کوالٹی انڈیکس 206 پر ہے جو آلودگی کے اعتبار سے چوتھا درجہ ہے اور اسے آلودگی کا برا درجہ خیال کیا جاتا ہے ۔ لاہور کے آلودہ ترین علاقوں میں ماڈل ٹاون آج سرفہرست ہے جہاں اے کیو آئی424ریکارڈ کیا گیا ہے ، جبکہ ظفر علی روڈ 371 اے کیو آئی کیساتھ دوسرے اور گلبرگ تھری کا علاقہ 329 اے کیو آئی کیساتھ تیسرے نمبر پر ہے۔
محکمہ موسمیات کے مطابق آج شہر میں کم سے کم درجہ حرارت20 ڈگری اور زیادہ سے زیادہ36 ڈگری رہنے کی توقع ہے، جبکہ ہوا میں نمی کا تناسب64 فیصد ریکارڈ کیا گیاہے۔
