شہر لاہور کا موسم آج بھی گرم اور خشک ہے، اگلے ہفتے سے گرد آلود ہواوں کا امکان ہے

(مائرہ ارجمند) آج ہفتہ ہے ،مارچ کی 26 تاریخ عیسوی سال 2022، 22 شبعاں اور قمری سال 1443 جبکہ چیت کی13 تاریخ اور دیسی کیلینڈر کا 2079 واں سال ہے۔

آج لاہور کا موسم گرم اور خشک ہے اور دور دور کوئی امکان نہیں ۔ مارچ ہی کے مہینے میں گرمی کی شدید لہر کی وجہ سے پنجاب کے میدانی علاقوں میں گندم کی فصل پک چکی ہے اور ایک دو روز میں کٹائی بھی شروع ہو جائے گی۔ اس سال مارچ کے دوسرے ہفتہ سے شہر کا درجہ حرارت 35 سے 40 سینٹی گریڈ کے درمیان چلا آ رہا ہے جو اس ماہ میں گزتہ 50 سال کی ریکارڈ گرمی ہے کیونکہ عام طور پر مارچ میں زیادہ سے زیادہ درجہ حرارت 30 سینٹی گریڈ رہتا ہے ۔

آلودگی کی بات کی جائے تو موسم سرما کے مقابلے میں فضائی آلودگی میں خاطر خواہ کمی واقع ہوئی ہے۔ چند روز قبل لاہور کی فضا بلکل صاف ہو گئی تھی اور ائیر کوالٹی انڈیکس 50 کے لگ بھگ تھا جو موسم سرما میں 750 سے بھی تجاوز کر چکا تھا۔ آج لاہور دنیا بھر کے آلودہ ترین شہروں میں دوسرے نمبر پر ہے ۔ لاہور میں مجموعی اے کیو آئی یعنی ائیر کوالٹی انڈیکس 187 پر ہے جو آلودگی کے اعتبار سے دوسرا درجہ ہے اور اسے آلودگی کا خطرناک درجہ خیال کیا جاتا ہے ۔ لاہور کے آلودہ ترین علاقوں میں ڈیفنس فیز 5 آج سرفہرست ہے جہاں اے کیو آئی 281 ریکارڈ کیا گیا ہے ،گلبرگ میں ظفر علی روڈ کے گردونواح میں اے کیو آئی ہے 269 ہے اور یہ لاہور کا دوسرا آلودہ ترین علاقہ ہے جبکہ ٖایچی سن کالج لاہور اور مال روڈ کے گرد و نواح شہرکا تیسرا آلودہ ترین علاقہ ہےجہاں اے کیو آئی 246 ریکارٖڈ ہوا۔

آنے والے چوبیس گھنٹوں میں لاہور میں بارش کا کوئی امکان نہیں زیادہ سے زیادہ درجہ حرارت 38 ڈگری سینٹی گریڈ اور کم سے کم 14 رہنے کا امکان ہے ۔ ہوا میں نمی کا تناسب 64 ریکارڈ کیا گیا ہے