(مائرہ ارجمند) آج ہفتہ ہے ،مارچ کی 19 تاریخ عیسوی سال 2022، 15 شبعاں اور قمری سال 1443 جبکہ چیت کی6 تاریخ اور دیسی کیلینڈر کا 2079 واں سال ہے۔
آج لاہور کا موسم گزشتہ دنوں کے مقا بلے میں کم گرم اور مطلع جزوی طور پر ابر آلود ہے لیکن اس دفعہ مارچ ہی میں غیر معمولی طور پر گرمی شروع ہو چکی ہے اور آنے والے چند روز میں درجہ حرارت مزید بڑھے گا ۔ مارچ کے ان دنوں کا اگر گزشتہ برس کے ساتھ موازنہ کیا جائے تو درجہ حرارت میں کم و بیش 10 ڈگری کا فرق ہے ۔محکمہ موسمیات کے مطابق رواں ماہ کے آخر تک بارش کا دور دور تک کوئی امکان نہیں ۔
آلودگی کی بات کی جائے تو موسم سرما کے مقابلے میں فضائی آلودگی میں خاطر خواہ کمی واقع ہوئی ہے۔ چند روز قبل لاہور کی فضا بلکل صاف ہو گئی تھی اور ائیر کوالٹی انڈیکس 50 کے لگ بھگ تھا جو موسم سرما میں 750 سے بھی تجاوز کر چکا تھا تاہم اب آلودگی کا مسئلہ پھر سے سر اٹھانے لگا ہے اور آج لاہور دنیا بھر کے آلودہ ترین شہروں میں سر فہرست ہے ۔ لاہور میں مجموعی اے کیو آئی یعنی ائیر کوالٹی انڈیکس 184 پر ہے جو آلودگی کے اعتبار سے تیسرا درجہ ہے اور اسے آلودگی کا خطرناک درجہ خیال کیا جاتا ہے ۔ لاہور کے آلودہ ترین علاقوں میں کوٹ لکھپت آج سرفہرست ہے جہاں اے کیو آئی287 ریکارڈ کیا گیا ہے ، ٖڈیفنس فیز 5 میں اے کیو آئی ہے 270 ہے اور یہ لاہور کا دوسرا آلودہ ترین علاقہ ہے جبکہ ظفر علی روڈ 267 اے کیو آئی کیساتھ تیسرے نمبر پر ہے۔
محکمہ موسمیات کے مطابق آج شہر میں کم سے کم درجہ حرارت22 ڈگری اور زیادہ سے زیادہ40ڈگری رہنے کی توقع ہے، جبکہ ہوا میں نمی کا تناسب 83 فیصد ریکارڈ کیا گیاہے۔
