شہر لاہور کا موسم،کہیں تیز کہیں آہستہ بارشوں کا سلسلہ جاری، ہوائی آلودگی میں لاہور دوسرے پر

(مائرہ ارجمند) آج اتوار ہے اگست کی 07 تاریخ عیسوی سال 2022، محرم کی 08 اور قمری سال 1444 جبکہ 23 ساون اور دیسی کیلینڈر کا 2079 واں سال ہے۔

ملک کےبیشتر علاقوں میں موسم گرم اورمرطوب رہے گا۔ تاہم کشمیر،بالائی پنجاب، بالائی خیبرپختونخوا اور گلگت بلتستان میں تیز ہواؤں اور گرج چمک کے ساتھ بارش کا امکان۔ اس دوران زیریں سندھ اور شمالی بلوچستان میں بعض مقامات پر بار ش متوقع۔

آلودگی کی بات کی جائے تو صورتحال بدتر ہے اور آج لاہور دنیا بھر کے شہروں میں آلودگی کے اعتبار سے دوسرے نمبر پر ہے۔

لاہور کا مجموعی اے کیو آئی یعنی ائیر کوالٹی انڈیکس 165 ہے ۔

لاہور میں شاہدرہ کا علاقہ 223 اے کیو آئی کے ساتھ پہلے جبکہ گلبرگ 2 اور گردونواح 191 اے کیو آئی کیساتھ دوسرا آلودہ ترین علاقہ ہے ۔ کوٹ لکھپت اور قائد اعظم انڈسٹریل اسٹیٹ کا علاقہ 181 اے کیو آئی کیساتھ تیسرے نمبر پر ہے۔

محکمہ موسمیات کے مطابق آنے والے 24 گھنٹوں کے دوران لاہور میں کہیں تیز کہیں آہستہ بارشوں کا سلسلہ جاری رہے گا۔ ہوا میں نمی کا تناسب 86 فیصد تک ہو چکا ہے ۔ آج زیادہ سے زیادہ درجہ حرارت 31 ڈگری سینٹی گریٖڈ اور کم سے کم 29 ڈگری رہنے کا امکان ہے۔