شہر لاہور کا موسم ابر آلود ، آج رات میں بھی بادل برسنے کا امکان،دنیا بھر میں لاہور آج آلودہ ترین شہروں کی فہرست میں دوسرے نمبر پر

(مائرہ ارجمند) آج منگل ہے جولائی کی 12 تاریخ عیسوی سال 2022، ذوالحج کی 12 اور قمری سال 1443 جبکہ 27 ہاڑ اور دیسی کیلینڈر کا 2079 واں سال ہے۔

اسلام آباد، بالائی اوروسطی پنجاب،خیبر پختونخوا، مشرقی بلوچستان ،کشمیر اورزیریں سندھ میں تیز ہواؤں اور گرج چمک کے ساتھ بارش کا امکان ۔راول پنڈی ، اسلام آباد، بالائی خیبر پختونخوا، بالائی پنجاب اور کشمیر میں موسلادھار بارش کی توقع۔

آلودگی کی بات کی جائے تو صورتحال برقرار ہے اور آج لاہور دنیا بھر کے شہروں میں آلودگی کے اعتبار سے دوسرے نمبر پر ہے۔

لاہور کا مجموعی اے کیو آئی یعنی ائیر کوالٹی انڈیکس 141 ہے ۔

لاہور میں کوٹ لکھپت اور قائد اعظم انڈسٹریل اسٹیٹ کے علاقے 184 اے کیو آئی کے ساتھ پہلے اور گلبرگ اور فدا حسین روڈ 180 اے کیو آئی کیساتھ دوسرا آلودہ ترین علاقہ ہے ۔ جبکہ ڈی ایچ اے فیز 5 اور اسکے گرد و نواح 166 اے کیو آئی کیساتھ تیسرے نمبر پر ہیں ۔

محکمہ موسمیات کے مطابق آنے والے 24 گھنٹوں کے دوران لاہور کے کئی علاقوں میں بارش کا امکان ہے اور ہوا میں نمی کا تناسب 60 فیصد تک ہو چکا ہے ۔ آج زیادہ سے زیادہ درجہ حرارت 35 ڈگری سینٹی گریٖڈ اور کم سے کم 28 ڈگری رہنے کا امکان ہے۔