شہر لاہور کا موسم،آج لاہور میں وقفے وقفے سے بارشوں کا سلسلہ جاری رہے گا، ہوائی آلودگی میں کمی
(مائرہ ارجمند) آج پیر ہے اگست کی 15 تاریخ عیسوی سال 2022، محرم کی 17 اور قمری سال 1444 جبکہ 31 ساون اور دیسی کیلینڈر کا 2079 واں سال ہے۔
خیبرپختونخوا، کشمیر ، پنجاب، اسلام آباد، بلوچستان اور سندھ میں بیشتر مقا مات پر جبکہ گلگت بلتستان میں چند مقا مات پر تیزہواؤں اور گرج چمک کے ساتھ بارش کا امکان۔ اس دوران خیبر پختو نخوا، اسلام آباد، بالائی پنجاب اور زیریں سندھ میں کہیں کہیں موسلادھار بارش بھی متوقع۔
آلودگی کی بات کی جائے تو حالات معتدل ہے اور آج لاہور دنیا بھر کے شہروں میں آلودگی کے اعتبار سے پانچویں نمبر پر ہے۔
لاہور کا مجموعی اے کیو آئی یعنی ائیر کوالٹی انڈیکس 109 ہے ۔
کوٹ لکھپت اور قائد اعظم انڈسٹریل اسٹیٹ کا علاقہ 154 اے کیو آئی کے ساتھ پہلے جبکہ ڈی ایچ اے فیز 5 کا علاقہ 152 اے کیو آئی کیساتھ دوسرا آلودہ ترین علاقہ ہے ۔ امریکی کاؤنسلیٹ اور گردونواح کا علاقہ 152 اے کیو آئی کیساتھ تیسرے نمبر پر ہے۔
محکمہ موسمیات کے مطابق آنے والے 24 گھنٹوں کے دوران لاہور میں وقفے وقفے سے بارشوں کا سلسلہ جاری رہے گا۔ ہوا میں نمی کا تناسب 83 فیصد تک ہو چکا ہے ۔ آج زیادہ سے زیادہ درجہ حرارت 29 ڈگری سینٹی گریٖڈ اور کم سے کم 27 ڈگری رہنے کا امکان ہے۔
