(مائرہ ارجمند) آج جمعرات ہے جون کی 30 تاریخ عیسوی سال 2022، ذی القعدہ کی 30 اور قمری سال 1443 جبکہ 15ہاڑ اور دیسی کیلینڈر کا 2079 واں سال ہے۔
محکمہ موسمیات نے یکم جولائی سے 4 جولائی تک لاہور ، ملتان ، فیصل آباد ، گوجرانوالہ ، گجرات ،کراچی، حیدرآباد، ٹھٹھہ اور بدین میں گرج چمک کےساتھ بارش کا امکان ظاہر کیا ہے۔
محکمہ موسمیات کی جانب سے جاری الرٹ کے مطابق 30 جون سے 4 جولائی تک اسلام آباد، کشمیر اور دیگر علاقوں میں بھی موسلا دھار بارش کا امکان ہے۔
بتایا گیا ہے کہ ژوب، زیارت، خضدار اور لسبیلہ میں بھی گرج چمک کے ساتھ بارشوں کا امکان ہے جبکہ 2 سے 4 جولائی تک اسلام آباد، لاہور، راولپنڈی، 3 سے 5 جولائی تک کراچی اور حیدر آباد میں موسلا دھار بارش کے ساتھ اربن فلڈنگ کے بھی خطرات ہیں۔
محکمہ موسمیات کا کہناتھا کہ 2سے5جولائی کے دوران کراچی میں آندھی اور گرج چمک کے ساتھ بارش متوقع ہے ، بحیرہ عرب، خلیج بنگال سے نم ہوائیں 2جولائی کو مشرقی سندھ میں داخل ہوں گی ، عمر کوٹ، ٹھٹھہ ، بدین اور دادو میں اربن فلڈنگ کا خدشہ ہے ، 3 سے 5 جولائی کے درمیان سمندر میں طغیانی رہے گی ۔
اسکے علاوہ عید الاضحیٰ پرعوام کیلئےاچھی خبر ہے محکمہ موسمیات نےخوشخبری سنادی ہےکہ مون سون بارشوں کا دوسرا سپیل 5جولائی سےشروع ہوگا جوکہ 15 جولائی تک جاری رہے گا۔
آلودگی کی بات کی جائے تو صورتحال ایک مرتبہ پھر بہت خراب ہوچکی ہے اور آج لاہور دنیا بھر کے شہروں میں ایران کے دارلحکومت تہران کے بعد آلودگی کے اعتبار سے دوسرے نمبر پرہے۔
شہر میں کوٹ لکھپت اور قائد اعظم انڈسٹریل سٹیٹ کا علاقہ سب سے زیادہ آلودہ ہے جہاں اے کیو آئی لیول 297 تک پہنچ چکا ہے ہے جبکہ شاہدرہ کا علاقہ 186 اے کیو آئی کیساتھ دوسرے اور انارکلی بازار و گرد و نواح 184 اے کیو آئی کیساتھ لاہور میں تیسرے نمبر پر ہے۔
محکمہ موسمیات کے مطابق آنے والے 24 گھنٹوں کے دوران لاہور میں بارش کی پیش گوئی کی ہے شہر کا زیادہ سے زیادہ درجہ حرارت 44 ڈگری سینٹی گریڈ اور کم سے کم 29 رہنے کا امکان ہے ۔ ہوا میں نمی کا تناسب74فیصد رہے گا۔
