شہر لاہور کا موسم، آسمان صاف رہنے کا امکان، فضائی آلودگی میں لاہور دنیا بھر میں آٹھویں نمبر پر

(اسیس علی) آج منگل ہے جنوری کی 31 تاریخ عیسوی سال 2023، رجب کی 08 اور قمری سال 1444 جبکہ 18 ماگھ اور دیسی کیلینڈر کا 2079 واں سال ہے۔

ملک کے بیشتر علاقوں میں موسم سرد اور خشک جبکہ شمالی بلوچستان اور بالائی علاقوں میں شدید سرد رہے گا۔ اس دوران کشمیر، گلگت بلتستان میں چند مقا مات پر ہلکی بارش اورپہاڑوں پر ہلکی برفباری کا امکان۔پنجاب کے میدانی علاقوں میں رات اورصبح کے اوقات میں دھند پڑنے کی توقع۔

آلودگی کی بات کی جائے تو حالات بدتر ہیں اور آج لاہور دنیا بھر کے شہروں میں آلودگی کے اعتبار سے آٹھویں نمبر پر ہے۔

ڈی ایچ اے فیز 8 کا علاقہ 213 اے کیو آئی کے ساتھ پہلے نمبر پر، کوٹ لکھپت اور قائداعظم انڈسٹریل اسٹیٹ کا علاقہ 188 اے کیو آئی کیساتھ دوسرا آلودہ ترین علاقہ ہے۔ کینال بینک ہاؤسنگ سکیم کا علاقہ 185 اے کیو آئی کیساتھ تیسرے نمبر پر ہے۔

محکمہ موسمیات کے مطابق آنے والے 24 گھنٹوں کے دوران لاہور میں دوپہر کے بعد آسمان صاف رہنے کا امکان ہے۔ ہوا میں نمی کا تناسب 57 فیصد تک ہو چکا ہے ۔ آج زیادہ سے زیادہ درجہ حرارت 20 سینٹی گریڈ اور کم سے کم 07 ڈگریڈ رہنے کا امکان ہے۔