آج شہر لاہور کا موسم شدید گرم رہے گا ، سال کی تیسری اور شدید ترین گرمی کی لہر شروع ، آلودگی میں بھی پہلا نمبر برقرار

(مائرہ ارجمند) آج اتوار ہے جون کی 5 تاریخ عیسوی سال 2022،5 ذی القعدہ اور قمری سال 1443 جبکہ 22 جیٹھ اور دیسی کیلینڈر کا 2079 واں سال ہے۔

محکمہ موسمیات نے لاہور سمیت ملک بھر میں آئندہ 4 سے 5 روز کے دوران ملک میں شدید گرمی کی لہر کی پیشگوئی کر دی۔ یہ رواں سال میں گرمی کی تیسری اور شدید ترین لہر ہو گی۔

موسم کا حال بتانے والوں نے کہا ہے کہ ملک کے بیشتر علاقوں میں درجہ حرارت میں غیر معمولی اضافے کا امکان ہے۔سندھ اور مشرقی بلوچستان میں دن کے درجہ حرارت معمول سے زیادہ رہنے کا امکان ہے۔  دوپہر یا شام کے دوران گرد آلود ہوائیں چلنے کی بھی چل سکتی ہیں۔

محکمہ موسمیات کے مطابق گرمی کی لہر کے اس دورانیہ کے بعد بارش کا سلسلہ ملک کے بالائی/وسطی علاقوں میں داخل ہونے کا امکان ہے۔دوسری جانب پنجاب ڈیزاسٹر مینجمنٹ اتھارٹی نے مراسلہ جاری کردیا ہے جس میں کہا گیا ہے کہ دن کے اوقات میں درجہ حرارت مزید بڑھنے کا امکان ہے۔

مراسلے میں خبردار کیا گیا ہے کہ گرمی کی شدید لہر سے فصلوں کو نقصان پہنچ سکتا ہے۔اس کے علاوہ پنجاب ڈیزاسٹر مینجمنٹ اتھارٹی نے شہریوں کو ہیٹ ویو سے بچاؤ کیلئے بھی اقدامات کی ہدایت کر دی۔

 آلودگی کی بات کی جائے تو شہر میں آلودگی کی مجموعی صورتحال آج پھر خراب ہے اورآج لاہور عالمی سطح پر آلودہ ترین شہروں کی فہرست میں پہلے نمبر پر ہے ۔

لاہور کا مجموعی ائیر کوالٹی انڈیکس239 ہے۔

لاہور میں گلبرگ کی سید مراتب علی روڈ اسکے اطراف اسوقت اے کیو آئی385کیساتھ پہلے ، گلبرگ 2 کا علاقہ367اے کیو آئی کیساتھ دوسرے جبکہ ڈی ایچ اے فیز 5 اور اسکے آس پاس کاعلاقہ 227 اے کیو آئی کیساتھ تیسرے نمبرپر ہے

محکمہ موسمیات کے مطابق آنے والے 24 گھنٹوں کے دوران لاہور میں بارش کی پیش گوئی نہیں کی شہر کا زیادہ سے زیادہ درجہ حرارت 46 ڈگری سینٹی گریڈ اور کم سے کم 22 رہنے کا امکان ہے ۔ ہوا میں نمی کا تناسب68 فیصد رہے گا۔